The warderober

IN þe warderobe ye must muche entende besily

the robes to kepe well / & also to brusche þem̅ clenly;

with the ende of a soft brusche ye brusche þem clenly,

and yet ouer moche bruschynge werethe cloth lyghtly.

lett neuer wollyñ cloth ne furre passe a seuenyght

to be vnbrossheñ & shakyñ / tend þerto aright,

for moughtes be redy euer in þem to gendur & aliȝt;

þerfore to drapery / & skynnery euer haue ye a sight.

youre souerayñ aftir mete / his stomak to digest

yef he wille take a slepe / hym self þere for to rest,

looke bothe kercheff & combe / þat ye haue þere prest,

bothe pillow & hedshete / for hym̅ þe[y] must be drest;

yet be ye nott ferre hym fro, take tent what y say,

For moche slepe is not medcynable in myddis of þe day.

wayte þat ye haue watur to wasche / & towelle alle way

aftur slepe and sege / honeste will not hit denay.

TO PUT A LORD TO BED.

Whañ youre souerayne hathe supped / & to chambur takithe his gate,

þañ sprede forthe youre fote shete / like as y lered yow late;

thañ his gowne ye gadir of, or garment of his estate,

by his licence / & ley hit vpp in suche place as ye best wate.

vppoñ his bak a mantell ye ley / his body to kepe from cold,

Set hym̅ oñ his fote shete / made redy as y yow told;

his shoñ, sokkis, & hosyñ / to draw of be ye bolde;

[Fol. 185 b.]

þe hosyñ oñ youre shuldyr cast / oñ vppoñ your arme ye hold;

youre souereynes hed ye kembe / but furst ye knele to ground;

þe kercheff and cappe oñ his hed / hit wolde be warmely wounde;

his bed / y-spred / þe shete for þe hed / þe pelow prest þat stounde,

þat wheñ youre souereyñ to bed shall go / to slepe þere saaf & sounde,

The curteyns let draw þem̅ þe bed round about;

se his morter with wax or perchere þat it go not owt;

dryve out dogge250a and catte, or els geue þem̅ a clovt;

Of youre souerayne take no leue; / but low to hym̅ alowt.

looke þat ye haue þe basoñ for chambur & also þe vrnalle

redy at alle howres wheñ he wille clepe or calle:

his nede performed, þe same receue agayñ ye shalle,

& þus may ye haue a thank / & reward wheñ þat euer hit falle.

TO MAKE A BATH.