Fried metes

O Fruture viant / Frutur sawge, byñ good / bettur is Frutur powche;

Appulle fruture / is good hoot / but þe cold ye not towche.

Tansey is good hoot / els cast it not in youre clowche.

alle maner of leesseȝ / ye may forbere / herbere in yow none sowche.

L
e
n
-
v
o
y

Cookes with þeire newe conceytes, choppynge / stampynge, & gryndynge,

Many new curies / alle day þey ar contryvynge & Fyndynge

þat provokethe þe peple to perelles of passage / þrouȝ peyne soore pyndynge,

& þrouȝ nice excesse of suche receytes / of þe life to make a endynge.

Some with Sireppis / Sawces / Sewes, and soppes,

Comedies / Cawdelles cast in Cawdrons / ponnes, or pottes,

leesses / Ielies / Fruturs / fried mete þat stoppes

and distemperethe alle þe body, bothe bak, bely, & roppes:

Some maner cury of Cookes crafft Sotelly y haue espied,

how þeire dischmetes ar dressid with hony not claryfied.

Cow heelis / and Calves fete / ar dere y-bouȝt some tide

To medille amonge leeches & Ielies / whañ suger shalle syt a-side.

POTAGES.