Fumositees

Of alle maner metes ye must thus know & fele

þe fumositees of fysch, flesche, & fowles dyuers & feele,

And alle maner of Sawces for fische & flesche to preserue your lord in heele;

to yow it behouyth to knew alle þese euery deele.”

“Syr, hertyly y pray yow for to telle me Certenle

of how many metes þat ar fumose in þeire degre.”

“In certeyñ, my soñ, þat sone shalle y shew the

by letturs dyuers tolde by thries thre,

F, R, and S / in dyuerse tyme and tyde

F is þe furst / þat is, Fatt, Farsed, & Fried;

R, raw / resty, and rechy, ar comberous vndefied;

S / salt / sowre / and sowse / alle suche þow set a-side,

with other of the same sort, and lo thus ar thay,

Senowis, skynnes / heere / Cropyns / yonge fedurs for certeñ y say,

heedis / pynnyns, boonis / alle þese pyke away,

Suffir neuer þy souerayne / to fele þem, y the pray /

Alle maner leggis also, bothe of fowle and beestis,

the vttur side of the thyghe or legge of alle fowlis in feestis,

the fumosite of alle maner skynnes y promytt þee by heestis,

alle þese may benym þy souerayne / from many nyghtis restis.”

“Now fayre befalle yow fadur / & welle must ye cheve,

For these poyntes by practik y hope fulle welle to preve,

and yet shalle y pray for yow / dayly while þat y leue /

bothe for body and sowle / þat god yow gyde from greve;

Praynge yow to take it, fadur / for no displesure,

yf y durst desire more / and þat y myghte be sure

to know þe kervynge of fische & flesche / aftur cockes cure:

y hed leuer þe sight of that / thañ A Scarlet hure.”

KERUYNG OF FLESH.