Sawce for fishe

“Yowre sawces to make y shalle geue yow lerynge:

Mustard is / is metest with alle maner salt herynge,

Salt fysche, salt Congur, samoun, with sparlynge,

Salt ele, salt makerelle, & also withe merlynge.

Vynegur is good to salt purpose & torrentyne,

Salt sturgeoñ, salt swyrd-fysche savery & fyne.

Salt Thurlepolle, salt whale, is good with egre wyne,

withe powdur put þer-oñ shalle cawse ooñ welle to dyne.

Playce with wyne; & pike withe his reffett;

þe galantyne for þe lamprey / where þey may be gete;

verdius to roche / darce / breme / soles / & molett;

Baase, flow[n]durs / Carpe / Cheveñ / Synamome ye þer-to sett.

Garlek / or mustard, vergeus þerto, pepur þe powderynge—

For þornebak / houndfysche / & also fresche herynge,

hake, stokfyshe, haddok / cod / & whytynge—

ar moost metist for thes metes, as techithe vs þe wrytynge.

[Fol. 184.]

Vinegre / powdur withe synamome / and gyngere,

to rost Eles / lampurnes / Creveȝ dew douȝ, and breme de mere,

For Gurnard / for roche / & fresche purpose, if hit appere,

Fresche sturgeoñ / shrympes / perche / molett / y wold it were here.

Grene sawce is good with grene fisch, y here say;

botte lynge / brett & fresche turbut / gete it who so may.

yet make moche of mustard, & put it not away,

For with euery dische he is dewest / who so lust to assay.

Other sawces to sovereyns ar serued in som solempne festis,

but these will plese them fulle welle / þat ar but hoomly gestis.

Now have y shewyd yow, my soñ, somewhat of dyuerse Iestis

þat ar remembred in lordes courte / þere as all rialte restis.”

“Now fayre falle yow fadir / in faythe y am full fayñ,

For louesomly ye han lered me þe nurtur þat ye han sayñ;

plesethe it you to certifye me with ooñ worde or twayñ

þe Curtesy to conceue conveniently for euery chamburlayñ.”

THE OFFICE OFF A CHAMBURLAYNE.