Transliteration

it-bi-e-ma iluGilgamiš šu-na-tam i-pa-aš-šar.
iz-za-kar-am a-na um-mi-šu
um-mi i-na ša-a-at mu-ši-ti-i̭a
ša-am-ḫa-ku-ma at-ta-na-al-la-ak
i-na bi-ri-it id-da-tim
ib-ba-šu-nim-ma ka-ka-’a ša-ma-i
ki-?-?-rum ša a-nim im-ku-ut a-na ṣi-ri-i̭a
áš-ši-šu-ma ik-ta-bi-it e-li-i̭a
ilam iš-šu-ma nu-uš-ša-šu u-ul el-ti-’i̭
ad-ki ma-tum pa-ḫi-ir e-li-šu
id-lu-tum ú-na-ša-ku ši-pi-šu
ú-um-mi-id-ma pu-ti
i-mi- du i̭a-ti
aš-ši-a-šu-ma at-ba-la-áš-šu a-na ṣi-ri-ki
um-mi iluGilgamiš mu-u-da-a-at ka-la-ma
iz-za-kar-am a-na iluGilgamiš
mi-in-di iluGilgamish ša ki-ma ka-ti
i-na ṣi-ri i-wa-li-id-ma
ú-ra-ab-bi-šu ša-du-ú
ta-mar-šu-ma [sa(?)]-ap-ḫa-ta at-ta
id-lu-tum ú-na-ša-ku ši-pi-šu
te-iṭ-ṭi-ra-šu(?) … šu-ú-zu
ta-tar-ra-[’a]-šu a-na ṣi-[ri-i̭]a
[iš-(?)] ti-lam-ma i-ta-mar ša-ni-tam
[šu-na-]ta i-ta-wa-a-am a-na um-mi-šu
[um-m]i a-ta-mar ša-ni-tam
[šu-na-ta a-ta]mar e-mi-a i-na zu-ki-im
[i-na?] Unuk-(ki) ri-bi-tim
ḫa-aṣ-ṣi-nu na-di-i-ma
e-li-šu pa-aḫ- ru
ḫa-aṣ-ṣi-nu-um-ma ša-ni bu-nu-šu
a-mur-šu-ma aḫ-ta-ta a-na-ku
a-ra-am-šu-ma ki-ma áš-ša-tim
a-ḫa-ap-pu-up el-šu
el-ki-šu-ma áš-ta-ka-an-šu
a-na a-ḫi-i̭a
um-mi iluGilgamish mu-da-at ka-la-ma
[iz-za-kar-am a-na iluGilgamish]
...................................

Col. II

aš-šum uš-[ta-] ma-ḫa-ru it-ti-ka.
iluGilgamish šu-na-tam i-pa-šar
iluEn-ki-[dû w]a?-ši-ib ma-ḫar ḫa-ri-im-tim
UR -ḫa-mu DI-?-al-lu-un
im-ta-ši a-šar i-wa-al-du
ûmê 6 ù 7 mu-ši- a-tim
iluEn-ki-dû te-bi- i-ma
ša-[am-ka-ta] ir- ḫi
ḫa-[ri-im-tu pa-a]-ša i-pu-ša-am-ma
iz-za-[kar-am] a-na iluEn-ki-dû
a-na-ṭal-ka dEn-ki-dû ki-ma ili ta-ba-áš-ši
am-mi-nim it-ti na-ma-áš-te-e
ta-at-ta-[na-al-]la -ak ṣi-ra-am
al-kam lu-ùr-di- ka
a-na libbi Uruk-(ki) ri-bi-tim
a-na biti [el-]lim mu-ša-bi ša A-nim
dEn-ki-dû ti-bi lu-ru-ka
a-na É-[an-n]a mu-ša-bi ša A-nim
a-šar [iluGilgamiš] it-[.........] ne-pi-ši-tim(?)
ù at--di [ -] ma
ta- ra-ma-an- ka
al-ka ti-ba i-[na] ga-ag-ga-ri
ma-a-a? -ak ri-i-im
iš-me a-wa-az-za im-ta-gár ga-ba-ša
mi-il-kum ša sinništi
im-ta-[ku]-ut a-na libbi-šu
iš-ḫu-uṭ li-ib-ša-am
iš-ti-nam [ú]-la-ab-bi-iš-šu
li-ib- [ša-am] ša-ni-a-am
ši-i it-ta-al-ba- áš
ṣa-ab-ta-at ga-az- zu
ki-ma ? i-ri-id-di-šu
a-na gu-up-ri ša ri-i-im
a-š[ar ] tar-ba-ṣi-im
i-na -ḫu-ru ri-i̭a-ú
.............................

(About two lines broken away.)

Col. III

ši-iz-ba ša na-ma-áš-te-e
i-te-en- ni- iḳ
a-ka-lam iš-ku-nu ma-ḫar-šu
ip-te-iḳ-ma i-na -aṭ-ṭal
ù ip-pa-al-la- as
u-ul i-di dEn-ki- dû
aklam a-na a-ka-lim
šikaram a-na ša-te-e-im
la-a lum-mu- ud
ḫa-ri-im-lum pi-ša i-pu-ša-am- ma
iz-za-kar-am a-na iluEn-ki-dû
a-ku-ul ak-lam dEn-ki-dû
zi-ma-at ba-la-ṭi-im
bi-ši-ti ši-im-ti ma-ti
i-ku-ul a-ak-lam iluEn-ki-dû
a-di ši-bi-e-šu
šikaram iš-ti-a-am
7 aṣ-ṣa-am-mi-im
it-tap-šar kab-ta-tum i-na-an-gu
i-li-iṣ libba- šu- ma
pa-nu-šu [it-]ta(?)-bir -ru
ul-tap-pi-it [............]-i
šu-ḫu-ra-am pa-ga-ar-šu
ša-am-nam ip-ta-ša-áš-ma
a-we-li-iš i-mē
il-ba- áš li-ib-ša-am
ki-ma mu-ti i-ba-áš-ši
il-ki ka-ak-ka-šu
la-bi ú gi-ir- ri
iš-sa-ak-pu šab-[ši]-eš mu-ši-a-ti
ut- tap -pi-iš šib-ba-ri
la-bi uk-t[a ]-ši-id
it-ti immer na-ki-[e?] ra-bu-tum
iluEn-ki-dû ma-aṣ-ṣa-ar-šu-nu
a-we-lum wa-ru-um
iš-[te]-en id-lum
a-na[ ........ u]-za-ak-ki-ir
...........................

(About five lines broken away.)

Reverse I

..............................
i-ip-pu-uš ul-ṣa-am
iš-ši-ma i-ni-i-šu
i-ta-mar a-we-lam
iz-za-kar-am a-na ḫarimti
ša-am-ka-at uk-ki-ši a-we-lam
a-na mi-nim il-li-kam
zi-ki-ir-šu lu-uš-šu
ḫa-ri-im-tum iš-ta-si a-we-lam
i-ba-uš-šu-um-ma i-ta-mar-šu
e-di-il e-eš-ta-ḫi-[ṭa-am]
mi-nu a-la-ku-zu na-aḫ- [ -]ma
e pi-šu i-pu-ša-am-[ma]
iz-za-kar-am a-na iluEn-[ki-dû]
bi-ti-iš e-mu-tim
ši-ma-a-at ni-ši-i- ma
tu-ṣa-ar pa-a-ta-tim
a-na âli dup-šak-ki-i e ṣi-en
UG-AD-AD-LIL e-mi ṣa-a-a-ḫa-tim
a-na šarri Unuk-(ki) ri-bi-tim
pi-ti pu-uk epši a-na ḫa-a-a-ri
a-na iluGilgamiš šarri ša Unuk-(ki) ri-bi-tim
pi-ti pu-uk epši
a-na ha-a-a-ri
áš-ša-at ši-ma-tim i-ra-aḫ-ḫi
šu-u pa-na-nu-um-ma
mu-uk wa-ar-ka-nu
i-na mi-il-ki ša ili ga-bi-ma
i-na bi-ti-iḳ a-pu-un-na-ti-šu
ši- ma- az- zum
a-na zi-ik-ri id-li-im
i-ri-ku pa-nu-šu

Reverse II

(About five lines broken away.)

i-il-la-ak- ..........
ù ša-am-ka-atar-ki-šu
i- ru- ub-ma a-na libbi Uruk-(ki) ri-bi-tim
ip-ḫur um-ma-nu-um i-na ṣi-ri-šu
iz-zi-za-am-ma i-na zu-ki-im
ša Unuk-(ki) ri-bi-tim
pa-aḫ-ra-a-ma ni-šu
i-ta-mē-a i-na ṣi-ri-šu pi(?)-it-tam
a-na mi-[ni] iluGilgamiš ma-ši-il
la-nam ša- pi- il
e-ṣi[ pu]-uk-ku-ul
i ? -ak-ta
i[- -]di i-ši?
ši-iz-ba ša[na-ma-]áš-[te]-e
i-te- en- ni- iḳ
ka-i̭ā-na i-na [libbi] Uruk-(ki) kak-ki-a-tum
id-lu-tum u-te-el-li- lu
ša-ki-in ip-ša- nu
a-na idli ša i-tu-ru zi-mu-šu
a-na iluGilgamiš ki-ma i-li-im
ša-ki-iš-šum me-iḫ-rum
a-na ilatIš-ḫa-ra ma-i̭ā-lum
na- [di]-i- ma
iluGilgamish id-na-an(?)...
i-na mu-ši in-ni-[ -]id
i-na-ak-ša-am- ma
it-ta-i-na zûki
ip-ta-ra-[ku ]-ak-tām
ša iluGilgamish
........... da-na(?) ni-iš-šu

Col. III

ur-(?)ḫa .....................
iluGilgamiš ................
i-na ṣi-ri ....................
i-ḫa-an-ni-ib [pi-ir-ta-šu?]
it-bi-ma ...
a-na pa-ni- šu
it-tam-ḫa-ru i-na ri-bi-tu ma-ti
iluEn-ki-dû ba-ba-am ip-ta-ri-ik
i-na ši-pi-šu
iluGilgamiš e-ri-ba-am u-ul id-di-in
iṣ-ṣa-ab-tu-ma ki-ma li-i-im
i- lu- du
zi-ip-pa-am ’i-bu- tu
i-ga-rum ir-tu-tū
iluGilgamiš ù iluEn-ki- dû
iṣ-ṣa-ab-tu-ù- ma
ki-ma li-i-im i-lu-du
zi-ip-pa-am ’i-bu- tu
i-ga-rum ir-tu-tū
ik-mi-is-ma iluGilgamiš
i-na ga-ga-ag-ga-ri ši-ip-šu
ip-ši-iḫ uṣ-ṣa-šu- ma
i-ni-’i i-ra-az-zu
iš-tu i-ra-zu i-ni-ḫu
iluEn-ki-dû a-na ša-ši-im
iz-za-kar-am a-na iluGilgamiš
ki-ma iš-te-en-ma um-ma-ka
ú- li- id- ka
ri-im-tum ša zu- pu-ri
ilat-Nin- sun- na
ul-lu e-li mu-ti ri-eš-su
šar-ru-tam ša ni-ši
i-ši-im-kum iluEn-lil

duppu 2 kam-ma
šu-tu-ur e-li …
4 šu-ši