XX

Þe lorde ful lowde with lote, & la3ed myry,

When he se3e sir G: with solace he speke3;

Þe goude ladye3 were geten, & gedered þe meyny,

He schewe3 hem þe schelde3, & schapes hem þe tale,

Of þe largesse, & þe lenþe, þe liþerne3 alse,

Of þe were of þe wylde swyn, in wod þer he fled.

Þat oþer kny3t ful comly comended his dede3,

& praysed hit as gret prys, þat he proued hade;

For suche a brawne of a best, þe bolde burne sayde,

Ne such sydes of a swyn, segh he neuer are.

Þenne hondeled þay þe hoge hed, þe hende mon hit praysed,

& let lodly þerat þe lorde forte here:

"Now Gawayn," quod þe god mon, "þis gomen is your awen,

Bi fyn for-warde & faste, faythely 3e knowe."

"Hit is sothe," quod þe segge, "& as siker trwe;

Alle my get I schal yow gif agayn, bi my trawþe."

He [hent] þe haþel aboute þe halse, & hendely hym kysses,

& efter-sones of þe same he serued hym þere.

"Now ar we euen," quod þe haþel, "in þis euen-tide,

Of alle þe couenauntes þat we knyt, syþen I com hider,

bi lawe;"
Þe lorde sayde, "bi saynt Gile,
3e ar þe best þat I knowe,
3e ben ryche in a whyle,
Such chaffer & 3e drowe."