Poema Morale (Trinity Ms.)

Lambeth MS (above)
Parallel Texts

I

ch am nu elder þan ich was a wintre ⁊ a lore.

Ich wealde more þan idude mi wit oh to be more

To longe ich habbe child iben a worde ⁊ a dade.

Þeih ibie a winter eald to jung ich am on rade.

Vnnet lif ich habbe ilad ⁊ ȝiet me þincheð ilade

Þan ibiðenche me þar on wel sore ime adrade.

Mast al ich habbe idon is idelnesse ⁊ chilce.

Wel late ich habbe me bi þoht bute me god do milce.

Fele idel word ich habbe ispeken seðen ich speken cuðe.

⁊ fele ȝeunge dade idon þe me ofðinkeð nuðe.

Alto lome ich habbe igult a werke ⁊ a worde.

Alto muchel ic habbe ispend to litel ileid on horde.

Mast al þat me likede ar nu hit me mislicað.

Þe mu[c]hel folȝeð his iwil him selfen he biswicað.

Ich mihte habben bet idon. hadde ich þo iselðe

Nu ich wolde ac ine mai for elde ⁊ for unhalðe.

Elde me is bistolen on ar ich hit iwiste

Ne mai ich isien bifore me for smeche ne for miste.

Arȝe we beð to don god to juel al to þriste

More eie stondeð man of man þan him do of criste.

Þe wel ne deð þe hwile he mai wel ofte hit sal him rewen.

Þan alle men sulle ripen þat hie ar sewen.

Do al to gode þat he muȝe ech þe hwile he beð aliue.

Ne lipne noman to muchel to childe ne to wiue. |

Þe þe him selfe forȝiet for wiue oðer for childe

He sal cumen on euel stede bute him god be milde.

Sende god biforen him man þe hwile he mai to heuene

For betre is on almesse biforen þan ben after seuene.

Ne bie þe leuere þan þe self ne þi mæi ne þi mowe

Sot is þe is oðer mannes frend betere þan his owen.

Ne hopie wif to hire were ne were to his wiue

Be for him self afric man þe hwile he beð aliue.

Wis þe him selue biðencheð þe hwile he mót libben

For sone willeð him forȝiete þe fremde ⁊ þe sibbe.

Þe wel ne doð þe hwile he mai ne sal he þan he wolde.

For manimannes sore iswinc habbeð ofte unholde.

Ne solde noman don a furst ne laten wel to done

For maniman bihoteð wel þat hi forȝieteð sone.

Þe man þe wile siker ben to habben godes blisse.

Do wel him self þe hwile he mai þanne haueð hes mid iwisse.

Þe richemen weneð siker ben þu`r´ch wallen ⁊ thurh dichen.

He deð his aihte an siker stede þe hit sent to heueriche.

For þar`f he´ ben ofdrad of fure ne of þieue.

Þar ne mai hit him binime þe loðe ne þe lieue.

Þar ne þarf he habben care of here ne of ȝielde

Þider we sendeð ⁊ ec bereð to litel ⁊ to selde.

Þider `we solden´ drawen ⁊ don wel ofte ⁊ ilome.

For þar ne sal me us naht binime mid wrong wise dome. |

Þider we solde ȝierne drawen wolde ȝie me ileuen.

For ne mai hit us binime no king ne no sẏrreue.

Alþat beste þat we habbeð her þider we solde sende.

For þar we mihte finden eft. ⁊ habben abuten ende.

Se þe her doð ani god for`to´ haben godes ore.

Al he hit sal eft finde þar ⁊ hundredfealde more.

Se þe aihte wile holde wel þe hwile hes muȝe wealden.

Ȝieue hes for godes luue þanne doð hes wel ihealden.

For ure swinch ⁊ ure tilðe is ofte wuned to swinde.

Ac al þat we ȝieueð for godes luue al we hit sulen eft finden.

Ne sal þar non euel ben unboht ne god unforȝolden.

Euel we doð al to muchel ⁊ god lasse þan we solden.

Se þe mast doð nu to gode ⁊ se last to lothe.

Eiðer to litel ⁊ to muchel hem sal þunche boðe.

Þar me sal ure werkes weiȝen bifore þan heuen kinge.

⁊ ȝieuen us ure werkes lean after ure erninge.

Africh man mid þat he haueð mai bugge heueriche

Þe þe more haueð ⁊ þe þe lasse boðe iliche.

Alse on mid his peni se oðer mid his punde

Þis is þet wunderlukeste ware þat animan funde.

⁊ se þe more ne mai don mid his gode iþanke.

Alse wel se þe þe haued goldes fele manke.

And ofte god can more þanc þan þe him ȝieueð lasse.

Al his werkes ⁊ his weies is milce ⁊ rihtwi[s]nesse. |

Litel lóc is gode lef þe cumeð of gode wille

⁊ eðlate muchel ȝieue þan his herte is ille.

Heuene ⁊ erðe he ouer sihð his eien beð ful brihte.

Nis him no þing forholen swo muchel is his mihte.

Ne bie hit no swo derne idon ne on swo þuster nihte.

He wot hwat þencheð ⁊ hwat doð alle quike wihte

Nis louerd swilch is crist ne king swilch ure drihte

Boðe ȝiemeð þe his bien bi daie ⁊ bi nihte.

Heuene ⁊ erðe ⁊ al þat is biloken is in his honden

He doð al þat his wille is awatere ⁊ alonde.

He makeð þe fisses in þe sa þe fueles on þe lofte.

He wit ⁊ wealdeð alle þing ⁊ he sop alle safte.

He is ord a buten ord ⁊ ende abuten ende

He is one afre on eche stede wende þar þu wende.

He is buuen us ⁊ bineðen biforen ⁊ bihinde

Þe godes wille doð aihware he maiȝ him finde

Elche rune he hereð ⁊ he wot alle dade

He þurh sihð elches mannes þanc wi hwat sal us to rade.

We þe brekeð godes has ⁊ gulteð swo ilome

Hwat sulle we seggen oðer don á te muchele dome

We þe luueden unriht ⁊ euel lif ladden

Hwat sulle we seggen oðer don þar ængles beð ofdradde

Hwat sulle we beren us biforen mid hwan sulle we iqueme

We þe nafre god ne duden þan heuenliche deme. |

Þar sulle ben deflen swo fele þat willeð us forwreien.

Nabbeð hie no þing forȝieten of þat hie her iseien.

Alþat hie iseien her hie willeð cuðen þare

Bute we haben hit ibet þe hwile we here waren.

Al hie habbeð on here write þat we misduden here.

Þeih we hes ne niseien hie waren ure iferen.

Hwat sullen horlinges don þes wichen ⁊ þe forsworene

Wi swo fele beð icleped swo fewe bed icorene

Wi hwi waren hie biȝiete to hwan waren hie iborene.

Þe sulle ben to deaðe idemd ⁊ afremo forlorene.

Elch man `sal´ þar biclepien himselfen ⁊ ec demen.

His oȝen werc ⁊ his þanc to witnesse he sal temen.

Nemai him noman alse wel demen ne alse rihte

For non ne cnoweð hine alse wel buten one drihte.

Man wot him self best his werkes ⁊ his wille.

Se þe last wot he seið ofte mast se þit al wot is stille

Nis no witnesse alse muchel se mannes oȝen hierte

Hwo se seið þat hie beð hol him self wot his smierte.

Elch man sal him selfen demen to deaðe oðer to liue.

Þe witnesse of his oȝen werc to oðer þan hine sal driue.

Alþat afri man haueð idon seðen he cam to manne

Swo he hit iseie abóc iwrite he sal hit þenche þanne.

Ac drihte ne demeð noman after his biginninge

Ac al his lif sal ben teald after his endinge. |

Ȝief þe endinge is god al hit is god· ⁊ euel ȝief euel is þe ende.

God ȝieue þat ure ende be god ⁊ ȝieue þat he us lende.

Se man þe nafre nele don god ne nafre god lif lade.

Are deað ⁊ dom cumeð to his dure he maiȝ him sore a drade

Þat he ne muȝe þanne bidden ore for þat itit ilome.

For þi he wis þe bit ⁊ biȝiet ⁊ bet bifore dome.

Þanne þe deað is ate dure wel late he biddeð ore.

Wel late he lateð euel werc þan he hit ne mai don no more.

Senne lat þe ⁊ þu nah him þan þu hit ne miht do no more;

For þi he is sot þe swo abit to habben godes ore.

Þeih hweðere we hit leueð wel for drihte self hit sade.

Elche time sal þe man of þunche his misdade

Oðer raðer oðer later milce he sal imete.

Ac þe þe her naueð ibet muchel he haued to bete

Maniman seið hwo reche pine þe sal habben ende

Ne bidde ich no bet bie ich alesed a domesdai of bende.

Litel wot he `h´wat is pine ⁊ litel he cnoweð

Hwilch hit is þar sowle wunieð hwu biter wind þar bloweð.

Hadde he ben þar on oðer two bare tiden.

Nolde he for al midden eard þe þridde þar abiden.

Þat habbed isaid þe come þanne þit wiste mid iwisse.

Wo wurðe soreȝe seue ȝier for seue nihte blisse.

⁊ ure blisse þe ende haueð for ende lease pine

Betere is wori water þan atter imengd mid wine.

Swines brade is wel swete swo is of wilde diere.

Ac al to diere he hit abuið þe ȝiefð þar fore his swiere.

Ful wombe mai lihtliche speken of hunger ⁊ of fasten

Swo mai of pine þe not hwat is pine þe sal ilasten. |

Hadde fonded sume stunde he wolde seggen oðer

Eðlate him ware wif ⁊ child suster ⁊ fader ⁊ broðer.

Al he wolde oðerluker don ⁊ oðerluker þenche

Þan he biðohte an helle fur þat no wiht ne mai quenche.

Afre he wolde her in wo ⁊ in wane wunien

Wið þan he mihte helle fur biflen ⁊ bisunien.

Eðlate him ware al wele ⁊ erðeliche blisse

For to þe muchele blisse cume þis murie mid iwisse.

¶Ich wulle nu cumen eft to þe dome þe ich eow ar of sade.

On þe daie ⁊ on þe dome us helpe crist ⁊ rade

Þar we muȝen ben sore offerd ⁊ harde us ofdrade.

Þar elch sal al isien him biforen his word ⁊ ec his dade.

Al sal þar ben þanne cuð þat men luȝen her ⁊ halen.

Al sal þar ben þanne unwrien þat men her hudden ⁊ stalen.

We sullen alre manne lif icnowen alse ure oȝen

Þar sullen efninges ben to þe heie ⁊ to þe loȝe.

Ne sal þeih no man samie þiar ne þarf he him adrade.

Ȝief him her ofþincheð his gult ⁊ bet his mis dade.

For hem ne sameð ne ne grameð þe sulle ben iboreȝe

Ac þoðre habbeð same ⁊ grame ⁊ oðer fele soreȝe.

Þe dom sal ben sone idon ne last hit nowiht longe

Ne sal him noman mene þar of strencðe ne of wronge

Þo sulle habben hardne dom þe here waren hardde

Þo þe euel hielden wreche men ⁊ euel laȝe arerde.

Elch after þat he haueð idon sal þar ben þanne idemd

Bliðe mai he þanne ben þe god haueð wel iquemd.

Alle þo þe sprunge beð of adam ⁊ of eue

Alle hie sulle þider cume for soðe we hit ileued. |

Þo þe habbed wel idon after here mihte

To heueriche hie sulle fare forð mid ure drihte.

Þo þe deueles werkes habeð idon ⁊ þar inne beð ifunde

Hie sulle fare forð mid hem in to helle grunde.

Þar hie sulle wunien abuten ore ⁊ ende.

Brecð nafre eft crist helle dure for lesen hem of bende

Nis no sellich þeih hem be wo ⁊ þeih hem be uneaðe

Ne sal nafre eft crist þolien deað for lesen hem of deaðe.

Ænes drihten helle brac his frend he ut brohte

Him self he þolede deað for hem wel diere he hes bohte.

Nolde hit moȝe don for mai ne suster [for] broðer

Nolde sune don for fader ne no man for oðer.

Vre alre louerd for his þralles ipined he was arode

Ure bendes he unbond ⁊ bohte us mid his blode.

We ȝieueð uneaðe for his luue a steche of ure breade

Ne þenche we naht þar þat sal deme þe quica ⁊ þe deade.

Muchel luue he us kedde wolde we hit understonde.

Þat ure elderne mi`s´duden we habeð euel an honde.

Deað cam in þis middenærd þurh ealde deueles onde

⁊ senne ⁊ soreȝe ⁊ iswinch awatere ⁊ [a]londe.

Vre foremes faderes gult we abugeð alle

Al his ofsprung after him in harem is biualle

Þurst ⁊ hunger. chele ⁊ hete ⁊ alle unhalðe.

Þurh deað cam in þis midden eard ⁊ oðer unisalðe.

Nare noman elles dead ne sic ne unsele

Ac mihte libbe afremo ablisse ⁊ an hale. |

Litel lac is gode lief þe cumeð of gode wille.

⁊ eðlate muchel ȝieue þan his herte is ille

Litel hit þuncheð maniman ac muchel was þe senne

For hwan alle þolieð deað þe comen of here kenne

Here senne ⁊ ec ure oȝen us muȝe sore of þunche

For senne we libeð alle her in soreȝe ⁊ in swunche.

Seðen god nam swo mukel wrache for one misdede

We þe swo ofte misdoð we muȝen us eaðe ofdrade.

Adam ⁊ al his ofspreng for one bare senne.

Was fele hundred wintre an helle a pine ⁊ unwenne.

Þo þe ladeð here lif mid unrihte ⁊ mid wronge

Bute hit godes milce do hie sulle wunie þar longe.

Godes wisdom is wel muchel ⁊ alsse is his mihte

Ac nis his mihte nowiht lasse ac biðer ilke wihte.

More he one maiȝ forȝieue þan alle folc gulte cunne

Self deuel mihte habben milce ȝief he hit bigunne.

Þeþe godes milche secð iwis he mai hes finden

Ac helle king is ore leas wið þo þe he mai binden.

Se deð his wille mast he sal habbe werest mede

His bað sal be wallinde pich his bed barnende glede.

Werse he doð his gode wines þan his fiendes

God silde alle godes friend wið swo euele friende.

Nafre an helle ine cam ne cumen ich þar ne reche

Þeih ich aches woreldes wele þare mihte feche.

Þeih ich wille seggen eow þat wise men us saden

⁊ [a] boc hit is write þar me hit mai rade. |

Ic wille seggen hit þo þe hit hem self nesten

⁊ warnin hem wið here unfreme ȝief hie me willeð hlesten.

Vnderstondeð nu to meward eadimen ⁊ arme

Ich wille tellen eow of helle pine ⁊ warnin eow wið harme.

An helle hunger ⁊ þurst euel two iferen.

Þos pine þolieð þo þe ware meteniðinges here.

Þar is woning ⁊ wop after ache strate

Hie fareð fram hate [to] chele fram chele to hate.

[Þ]an hie beð in þe hate chele hem þuncheð blisse

[Þ]an hie cumeð eft to chele of hate hie habbeð misse.

[E]iðer doð `hem´ wo inoh nabbeð none lisse.

[N]iten hweðer hem doð wers to nafre none wisse.

[H]ie walkeð afre ⁊ secheð reste ac hie hes ne muȝen imeten.

[F]or þi þe hie nolde þe hwile hie mihten here senne beten.

[H]ie sec`h´eð reste þar non nis ac hie hies ne muȝen ifinden.

[A]c walkeð weri up ⁊ dun se water doð mid winde

[Þ]at beð þo þe waren her an þanc unstedefaste

[⁊] þo þe gode biheten aihte ⁊ hit him ilaste.

[⁊] þo þe god werc bigunnen ⁊ ful endin hit nolden.

[N]u waren her ⁊ nu þar ⁊ nesten hwat he wolden

[Þ]ar is pich þat afre walleð þar sulle wunien inne

[Þ]o þe ladeð here lif on werre ⁊ an unwinne.

[Þ]ar is fur þis hundredfeald hatere þan be ure.

[N]e mai hit quenche salt water ne auene stream ne sture.

[Þ]is is þat fur þat afre barneð ne mai no wiht [hit] quenche.

[Þ]ar inne beð þe was to lef wreche men to swenche. |

Þo þe [waren] swikele men ⁊ ful of euele wrenchen.

⁊ þo þe mihten euel don ⁊ lief hit was to þenchen.

Þe luueden rauing ⁊ stale hordom ⁊ druken

⁊ an defles werkes bliðeliche swunken.

Þo þe waren swo lease men þat mes ne mihte leuen

Medȝierne domes men ⁊ w`r´ongwise reuen.

Þo þe oðer mannes wif was lief her oȝen eðlate

⁊ þo þe sunegeden muchel on druken ⁊ on ate.

Þe wreche men binomen here aihte ⁊ leide his on horde.

Þe litel lete of godes bode ⁊ of godes worde.

⁊ þe his oȝen nolde ȝieue þar he iseih þe niede

Ne nolde ihere godes men þan he sat at his biede.

Þo þe was oðer mannes þing leuere þan hit solde

⁊ waren alto gradi of siluer ⁊ of golde.

Þo þe untrewnesse deden þan þe he solden ben holde.

⁊ leten al þat hie solden don ⁊ deden þat hie wolden.

Þo þe waren ȝietceres of þis wereldes aihte

⁊ dude al þat þe loðe gost hem tihte to ⁊ taihte.

⁊ Al `þo´ þe ani wise deuel iquemde

Þo beð mid him in helle fordon ⁊ demde.

Bute þo þe ofðuhte sore here misdade

⁊ Gunne here gultes bete ⁊ betere lif lade.

Þar beð naddren ⁊ snaken. eueten ⁊ fruden

Þe tereð ⁊ freteð þo euele swiken þe niðfule ⁊ þe prude

Nafre sunne þar ne sineð ne mone ne storre.

Þar is muchel godes hete ⁊ muchel godes oerre. |

Afre þar is euel smech þiesternesse ⁊ eie

Nis þar nafre oder liht þan þe swarte leie.

Þar ligeð ateliche fiend in stronge raketeie

Þat beð þo þe waren mid god angles swiðe heie.

Þat beð ateliche fiend ⁊ Eiseliche wihten

Þo sulle þe wreche sowle isien þe sinegeden þurh sihte

Þar is se loðe sathanas ⁊ belzebub se ealde

Eaðe he muȝen ben sore ofdrad þe sullen hes bihealde.

Nemai non herte hit þenche ne tunge hit ne mai telle

Hwu muchele pine ne hwu fele senden in helle

Of þo pine þe þar bieð nelle ich eow naht lie

Nis hit bute gamen ⁊ glie of þat man mai here drie.

⁊ ȝiet ne doð hem naht alse wo in þe loðe bende

Swo þat he witen þat here pine sal nafre habben ende

Þar beð þe haðene men þe waren laȝe lease.

Þe nes naht of godes bode ne of godes hease.

Euele cristene men hie beð here iferen

Þo þe here cristendom euele hielden here.

⁊ ȝiet he beð awerse stede aniðer helle grunde

Ne sullen nafre cumen út for peni ne for punde.

Ne mai hem noðer helpe þar ibede ne almesse

For naht solden bidde þar ore ne forȝieuenesse.

Silde him elch man þe hwile he mai wið þos helle pine.

⁊ warnie his frend þar wið swo ich habbe ido mine.

Þo þe silde hem ne cunnen ich hem wille tache

[I]ch can ben aiðer ȝief isal lichame ⁊ sowle lache. |

Late we þat god forbet alle mankenne

⁊ do we þat he us hat ⁊ silde we us wid senne.

Luue we god mid ure herte ⁊ mid al ure mihte

⁊ ure emcristen alse us self swo us tached drihte.

Al þat me radeð ⁊ singed bifore godes borde

Al hit hangeð ⁊ halt bi þese twam worde

Alle godes laȝes hie fulleð þe newe ⁊ þe ealde

Þe þe þos two luues halt ⁊ wile hes wel healde.

Ac hie bieð wel arefeð heald swo ofte we gulteð alle

For hit is strong te stonde longe ⁊ liht hit is to falle.

Ac drihte crist ȝeue us strengðe stonde þat we moten

⁊ of alle ure gultes ȝieue us cume bote.

We wilnieð after wereldes wele þe longe ne mai ilaste

⁊ legeð mast al ure swinc on þing unstedefaste.

Swunke [we] for godes luue half þat we doð for eihte.

Nare we naht swo ofte bicherd ne swo euele bikeihte

Ȝief we serueden god half þat we doð for erminges

We mihten habben more an heuene þa[n] ȝierles ⁊ kinges

Ne muȝe we werien naðer ne wið þurst ne wið hunger

Ne wid elde ne wið deað þe elder ne þe ȝeunger

Ac þar nis hunger ne þurst. deað ne unhalðe ne elde.

Of þesse riche we þencheð to ofte of þare alto selde.

We solden biþenchen us wel ofte ⁊ ilome

Hwat we beð to hwan we sullen ⁊ of hwan we come.

Hwu litle hwile we bieð her hwu longe elles ḥware

Hwat we muȝen habben her ⁊ hwat we findeð þare. |

Ȝief [we] waren wise men þus we solden þenchen

Bute we wurðen us iwar þis wereld us wile drenchen

Mast alle men hit ȝieueð drinken of on euele senche

He sal him cunnen silde wel ȝief hit him nele screnche.

Mid al mihtin godes luue úte we us biwerien

[W]ið þesses wreches woreldes luue þat hit ne muȝe us derien.

Mid almesse. mid fasten ⁊ mid ibeden werie we us wid senne.

Mid þo wapne þe god haued ȝieue alle man kenne.

[L]ate we þe brode strate ⁊ þane weiȝ bene

[Þ]e lat þe nieðe dal to helle of manne me mai wene.

Go we þane narewe pað ⁊ þene wei grene

[Þ]ar forð fareð wel litel folc ⁊ eche is fair ⁊ isene

[Þ]e brode strate is ure wil. þe is loð te læte.

[Þ]o þe folȝeð here iwil hie fareð bi þare strate.

[H]ie muȝen lihtliche cumen mid þare niðer helde

[Þ]urh one godelease wude to one bare felde

[Þ]a narewe pað is godes has · þar forð fareð wel feawe

[Þ]at beð þo þe hem sildeð ȝierne wið achen unðeawe.

[Þ]os goð uneaðe aȝien þe cliue ⁊ aȝien þe heie hulle

[Þ]os leten al here iwil for godes luue to fulle.

[G]o we alle þane wei for he us wile bringe

Mid þo feawe faire men bi fore þe heuen kinge

[Þ]ar is alre blisse mast mid angles songe.

[Þ]e is a þusend wintre þar ne þuncheð hit him naht longe. |

Þe last haueð blisse he haueð sswo muchel þat he ne bit no more

Þe þat blisse forgoð hit sal him rewen sore.

Ne mai non euel ne non wane ben in godes riche

Þeih þar ben wuniinges fele elch oðer uniliche

Sume þar habbeð lasse blisse ⁊ sume þar habbeð more

Elch after þat he dude her after þane þe swanc sore

Ne sal þar ben bread ne win ne oðer kennes este

God one sal ben ache lif ⁊ blisse ⁊ ache reste.

Ne sal þar ben foh ne grai ne cunin ne ermine

Ne aquerne ne metheschele ne beuer ne sabeline.

Ne sal þar ben naðer scat ne srud ne wereldes wele none.

Al þe blisse þe me us bihat al hit sal ben god one

Ne mai no blisse ben alse muchel se is godes sihte.

He is soð sunne ⁊ briht ⁊ dai a bute nihte.

He is aches godes ful nis him no wiht uten.

Nones godes hem nis wane þe wunieð him abuten.

Þar is wele a buten wane ⁊ reste a buten swunche.

Þe muȝen ⁊ nelleð þider cume hit hem mai of þunche.

Þar is blisse a buten treiȝe ⁊ lif abuten deaðe

Þo þe afre sulle wunie þar bliðe hie muȝe ben eaðe.

Þar is ȝieuð abuten elde ⁊ hale abuten unhalðe

Nis þar sareȝe ne sor non ne nafre unisalðe.

Þar me drihte self isien swo se is mid iwisse

He one mai ⁊ sal al ben angles ⁊ manne blisse. |

⁊ þeih ne bed here eien naht alle iliche brihte

Hi nabbeð naht iliche muchel alle of godes lihte

On þesse liue he naren naht alle of ore mihte

Ne þar ne sullen habben god. alle bi one wihte.

Þo sullen more of him isien þe luueden hine more

⁊ more icnowen ⁊ ec witen his mihte ⁊ his ore

On him hie sulle finden al þat man mai to hleste

On him he sullen ec isien al þat hie ar nesten.

[C]rist sal one bien inoȝh alle his derlinges.

[Þ]e one is muche more ⁊ betere þan alle oðer þinges.

[I]noh he haueð þe hine haueð þe alle þing wealdeð

[O]f him to isiene nis non sæd swo fair he is to bihelden

[G]od is swo mere ⁊ swo muchel in his godcunnesse

[Þ]at al þat elles was ⁊ is is fele werse ⁊ lasse.

[Ne] mai hit nafre noman oðer seggen mid iwisse

[H]wu muchele murihðe habbeð þo þe beð in godes blisse

[T]o þare blisse us bringe god þe rixleð a buten ende.

[Þ]ane he ure sowle unbint of lichamliche bende

[C]rist ȝieue us laden her swilch lif ⁊ habben her swilch ende;

[Þ]at we moten þider cumen þane we henne wende.

Amen.