VII. Memento Mori

“As for no. vi.”

Mon may longe lyues wene.

Ac ofte him lyeþ þe wrench.

feyr weder turneþ ofte in to reyne.

⁊ wunderliche makeþ his blench.

þar vore mon. þu þe by þench.

Al schal falwy þi grene.

waylaway. nys king ne quene.

þat ne schal drynke of deþes drench.

Mon er þu falle of þi bench.

þyne sunne þu aquench.

Nis non so strong. ne sterk. ne kene.

þat may ago deþes wyþer blench.|

Yung and olde. briht and schene.

Alle he ryueþ on o streng.

Fox and ferlych is his wrench.

Ne may no mon þar to yeynes.

way laway þreting ne bene.

Mede. liste. ne leches drench.

Mon let sunne and lustes þine.

wel þu do ⁊ wel þu þench.

Do bi salomones rede.

Mon. ⁊ þenne þu schalt wel do.

Do as he þe tauhte and seyde.

þat þin endinge þe bringeþ to.

þenne ne schaltu neuer mys do.

Ac sore þu myht þe adrede.

way laway such weneþ to lede.

Long lif. and blysse vnder fo.

Ac deþ luteþ in his scho.

Hym stilliche. to for do.

Mon hwi nultu þe bi knowe.

Mon hwi nultu þe bi seo.

of fule fulþe þu art isowe.

wurmes fode. þu schalt beo.

her nauestu blisse dayes þre.

Ac þi lif al þu last in wowe.

weylawey deþ þe schal a dun þrowe.

þer þu wenest heyust to steo.

In deþ schal þi lyf endi.

And in wop al þi gleo.

World and weole. þe bi swikeþ.

I wis heo beoþ þine ifo.

If þe world wiþ weole þe slykeþ

þat is for to do þe wo.

þare fore. let lust ouer go.

And eft hit þe likeþ. |

weylawey. sore he him bi swikeþ.

þat for one stunde oþer two.

wurcheþ him pyne. euer mo.

Mon. ne do þu nouht swo.