VI. Original of the Poem on the Lennox

Muireadhach Albanach, c͞c.

Saer do lennan a Leamhain,
Alun og mac Muireadhaigh
A chul druimnech gan duibhe,
Ua Luighdech a liathmhuine.
Maith do chonach gilla ngeal,
O do charais do cheidfhear,
Mac righ bealaigh do bhi an dan,
[Gur] bhi Leamhain a leannan.
Gearr-abhand hainm eacht oile,
A reimheas na rioghroidhe,
Go riacht Corc Muimnech tar muir;
Folt druimnech os a dhearcuibh.
Da tainic Fearadhach fionn,
Mac righ Alban na noirphioll,
Da ndearna re Corc cleamhnas,
Ar thocht ina thighearnas.
Tug Fearadhach, feirrde leom,
A inghean do Corc chuil-fhionn,
Lan da tairm Teamhair Mide,
Leamhain ainm na hinghine.
Toircheas rioghna rug Leamhain,
Maine mac Chuirc chuil-leabhair,
Do thaisigh na hucht an ten,
Do Chore Chaisil na coilen.
Aen do laithibh do Leamhain,
Mathair Mhaine mheirleabhair,
Caega inghen fa ban bonn,
Ag snamh innbhir na habhonn.
Baidhter i an ucht an chalaidh,
Leamhain inghean Fhearadhaigh,
Baister Leamhain ort da eis,
Meabhair nach olc re a fhaisneis.
Dob annamh ceim catha gall,
Fa timlibh uaine a abhann,
Fa meince leat a Leamhain,
Mac eillte fa tinnbhearaibh.
Do fhas chughat Alun og,
Mac Muireadhaigh na min rod,
Aluinn snuadh a ghlac nglan-ur,
Slat do chuan an ched Alun.
Noch ar leathchumthach leanna,
Alun og ua hOilealla,
Bi an gheag do fhine Alun,
Cead ag ibhe in aen ghalun.
Gen co beith acht aen tunna dfhion,
Ag fine Chuirc na caeimhriog,
Ni sochma siol ceann-glan Chuirc,
Da ndearna fion do anairt.
Mormhaer Leamhna leaca mhin,
Deagh-mhac inghine Ailin,
A gheal-lamh, a thaebh, a throigh,
Saer do leannan a Leamhain.
Saer.